កំពតថ្ងៃទី២៤ ខែមករា ឆ្នាំ២០២៣ តាមការបញ្ជាក់របស់មន្ត្រីជំនាញថា ឆ្នាំ២០២២កន្ល ងទៅនេះ ការប្រមូលផលនេសាទទឹកសាប និងសមុទ្រខេត្តកំពតប្រមូលបានជាង ២ម៉ឺន ៦ពាន់តោន សម្រាប់ផ្គត់ផ្គង់ក្នុងស្រុក និងនាំចេញទៅក្រៅប្រទេស។ មន្ត្រីជំនាញបានលើកឡើងថា វិស័យកសិកម្មគឺជាវិស័យមួយដែលមានសក្តានុពលខ្លាំងក្នុង នោះវិស័យជលផលគឺជាផ្នែកមួយដ៏សំខាន់ក្នុងការជួយទ្រទ្រង់ជីវភាពប្រជាពលរដ្ឋ និង សេដ្ឋកិច្ចរបស់ខេត្តផងដែរ។ នាយខណ្ឌរដ្ឋបាលជលផល លោក ស សុរិន បានប្រាប់ឱ្យដឹងថា តាមការចង្អុលបង្ហាញរបស់ ឯកឧត្តមអភិបាលខេត្តកំពត និងប្រធានមន្ទីរកសិកម្មរុក្ខាប្រមាញ់ និងនេសាទ ក្រុមការងាររបស់ខណ្ឌរដ្ឋបាលជលផល បានយកចិត្តទុកដាក់ និងខិតខំបំពេញការងាររបស់ខ្លួនបានល្អប្រសើរនៅឆ្នាំ២០២២កន្លងទៅនេះ។ ចំណែកការងារប្រមូលផលផលនេសាទទឹកសាប និងសមុទ្រអនុវត្តបានចំនួន ២៦ ០៣៥តោន ក្នុងនោះផលនេសាទទឹកសាបមានចំនួន ៦ ០០០តោន និងផលនេសាទសមុទ្រចំនួន ២០ ០៣៥តោន។ ក្រៅពីការផ្គត់ផ្គង់ទីផ្សារក្នុងស្រុក ផលនេសាទក៏បាននាំចេញចំនួន ៨០៦តោនផងដែរ ក្នុងនោះមានផលនេសាទកែច្នៃចំនួន ៣៥០តោន និងផលនេសាទស្រស់ចំនួន ៤៥៦តោន ខណៈដែលការផលិតទឹកត្រីវិញបានចំនួន ២លាន ៤ម៉ឺនលីត្រ។
លោកនាយខណ្ឌបានបញ្ជាក់ថា ដើម្បីទទួលបាននូវបរិមាណនៃការប្រមូលផលនេសាទដូចខាងលើ មន្ត្រីជំនាញពាក់ព័ន្ធសហគមន៍នេសាទ និងបងប្អូនប្រជានេសាទបានរួមគ្នាធ្វើការងារជាច្រើនដូចជា៖ ការធ្វើវារីវប្បកម្មសមុទ្របានចំនួន ២ ៣០៣តោន (មានបង្គា ៧៩២តោន, ត្រីឆ្ពង់ ៥៣៩តោន, ត្រីអាំងកឺយ ១៧៤តោន, ត្រីតុកកែ ៤៥៩តោន, ក្តាមថ្មចំនួន ៣៣៩តោន ខណៈដែលផលវារីវប្បកម្មទឹកសាបមានចំនួន ១ ៥៥២តោន, ផលិតកូនត្រីពូជបានចំនួន ៩ ៧០០០០០ក្បាលនៅតាមស្ថានីយភ្ញាស់កូនត្រីសរុបចំនួន ១៥កន្លែង, បានប្រមូលក្ដាមពងដាក់ចូលធនាគាក្ដាមបានចំនួន ១៣០គីឡូក្រាម ស្មើនិង ១ ៧៥៦ក្ដាម នៅធនាគារក្តាមសេះរបស់សហគមន៍នេសាទត្រពាំងរពៅ និងកែបថ្មី, បានបណ្តុះកូនកោងកាងនៅតាមសហគមន៍បានចំនួន ៧៤ ៣១០ដើម និងបានដាំកូនកោងកាងបានចំនួន ៤៩ ២៦០ដើម រហូតអភិរក្សព្រៃកោងកាងបានចំនួន ១ ៩៦៦ហិកតា, បានដាំសារ៉ាយសមុទ្រ ៣៦៧តោន(សារ៉ាយស្រស់), អភិរក្សស្មៅសមុទ្រទាំង ១១ប្រភេទ បានជាង ៨ពាន់ ៤រយហិកតា ,ផ្កាថ្មចំនួន ៩៥៣ហិកតា នៅក្នុងទីតាំងអភិរក្សទាំង ១៣កន្លែងនៅក្នុងខេត្ត។ ទទ្ទឹមនិងការងារអភិរក្សធនធានសមុទ្រ មន្ត្រីជំនាញពាក់ព័ន្ធ ក៏បានធ្វើការបង្ក្រាបបទល្មើស បានចំនួន ៦៥ករណីផងដែរ។ ក្នុងនោះបានរឹបអូស និងបំផ្លាញចោលលបកន្ទុយកណ្ដុរចំនួន ២៧ករណីស្មើនឹង ៥៧០លប, រឹបអូស និងបំផ្លាញចោលឈិបរុញដៃភ្ជាប់ឧបករណ៍ឆក់ ២៨ករណី, រឹបអូស និងបំផ្លាញចោលបង្គាចាក់សារធាតុគីមី(ចាក់ហួយ) ចំនួន ៧ ៧៧២គីឡូក្រាម និងពិន័យអន្តរការចំនួន ០៥ករណី, អប់រំណែនាំ ០៣ករណី និងចាក់ដីរំលោភចំណីព្រែក និងធ្វើរបង ០២ករណី។ សម្រាប់ឆ្នាំ២០២២ ខេត្តកំពតមានទូក និងកាណូតនេសាទកំពុងធ្វើប្រតិបត្ដិការតាមតំបន់ឆ្នេរសរុប ១ ០៥៣គ្រឿង មានទូកម៉ាស៊ីនបាត ៤៥២គ្រឿង, ទូកម៉ាស៊ីនក្រៅ៦០១គ្រឿង។
