រាជធានីភ្នំពេញ ៖ ដោយបានការឯកភាពពី នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស នារសៀលថ្ងៃទី០៩ ខែមករា ឆ្នាំ២០២០ ក្រុមការងារកងរាជអាវុធហត្ថលើផ្ទៃប្រទេស ដែលដឹកនាំដោយ លោកឧត្តមសេនីយ៍ទោ ឌៀប វណ្ឌី នាយរងសេនាធិការដ្ឋាន កងរាជអាវុធហត្ថលើផ្ទៃប្រទេស និងលោកវរសេនីយ៍ត្រី ម៉ាន់ ដាវីត នាយករងខុទ្ទកាល័យ បញ្ជាការដ្ឋាន កងរាជអាវុធហត្ថលើផ្ទៃប្រទេស ទទួលបន្ទុកសម្របសម្រួលមូលនិធិមហាគ្រួសារកងរាជអាវុធហត្ថទូទាំងប្រទេស និងលោកឧត្តមសេនីយ៍ត្រី សូ សារិន ស្នងការរង ស្នងការដ្ឋានយុត្តិធម៌ បាននាំយកថវិកាមូលនិធិមហាគ្រួសារកងរាជអាវុធហត្ថ ជាង៣០លានរៀល ទៅប្រគល់ជូនក្រុមគ្រួសារសព លោកវរសេនីយ៍ត្រី ម៉េង សៀកវេង ជំនួយការអង្គភាពនីតិវិធី កងរាជអាវុធហត្ថលើផ្ទៃប្រទេស ដែលទទួលមរណភាពដោយរោគាពាធ ។
លោកឧត្តមសេនីយ៍ទោ ឌៀប វណ្ឌី ក៏បានធ្វើការណែនាំនូវការសួរសុខទុក្ខ និងចូលរួមរំលែកទុក្ខដ៏ក្រៀមក្រំ របស់នាយឧត្តមសេនីយ៍ សៅ សុខា ទៅដល់ក្រុមគ្រួសារសព និងបានសម្តែងនូវការសោកស្តាយបំផុត ចំពោះការបាត់បង់ សមាជិកដ៏ល្អមួយរូបនេះ ចេញពីជួរអង្គភាពកងរាជអាវុធហត្ថ ។
ក្នុងនោះផងដែរ លោកវរសេនីយ៍ត្រី ម៉ាន់ ដាវីត បានឲ្យដឹងថា អង្គភាពកងរាជអាវុធហត្ថ ដែលដឹកនាំដោយ នាយឧត្តមសេនីយ៍ សៅ សុខា គឺបានសបញ្ជាក់ឲ្យឃើញពីការរីកចម្រើនលើគ្រប់វិស័យទាំងមូល ក្នុងកងរាជអាវុធហត្ថទូទាំងប្រទេស ជាពិសេសនាយឧត្តមសេនីយ៍ សៅ សុខា បានគិតគូរយ៉ាងយកចិត្តទុកដាក់ ក្នុងការបង្កើតមូលនិធិមហាគ្រួសារកងរាជអាវុធហត្ថនេះឡើង ក្នុងគោលបំណងជួយទៅដល់បុគ្គលិករបស់កងរាជអាវុធហត្ថទាំងអស់ នៅពេលដែលជួបទុក្ខលំបាក និងជាការរួមចំណែកជួយទៅដល់កិច្ចការងារក្នុងសង្គម និងសប្បុរសធម៌ ។
ជាចុងក្រោយ លោកឧត្តមសេនីយ៍ត្រី សូ សារិន តំណាងឲ្យលោកឧត្តមសេនីយ៍ទោ សៀ សម្បត្តិ ស្នងការ ស្នងការដ្ឋានយុត្តិធម៌កងរាជអាវុធហត្ថលើផ្ទៃប្រទេស ក៏បានធ្វើការចូលរួមសម្តែងការសោកស្តាយយ៉ាងក្រៀមក្រំបំផុត ជាមួយក្រុមគ្រួសារសព ក្នុងការបាត់បង់សមាជិកជាទីស្រលាញ់បំផុត ក៏ដូចជាការបាត់បង់មិត្តរួមកិច្ចការងារ ដ៏ល្អមួយរូបនេះផងដែរ ៕
